is wahm ki intiha nahin hai

is vahm kī intihā nahīñ hai

sab kuchh hai magar ḳhudā nahīñ hai

kyā is kā surāġh koī paa.e

jis chiiz kī ibtidā nahīñ hai

khultā hī nahīñ fareb-e-hastī

kuchh bhī nahīñ aur kyā nahīñ hai

is tarah sitam vo kar rahe haiñ

jaise merā ḳhudā nahīñ hai

tum ḳhush ho to hai mujhe nadāmat

har-chand mirī ḳhatā nahīñ hai

dekho to nigāh-e-vāpsīñ ko

is ek nazar meñ kyā nahīñ hai

duniyā kā bharam na khol ai aah

ye raaz abhī khulā nahīñ hai

har zarra hai shāhid-e-tajallī

is husn kī intihā nahīñ hai

sargarm-e-talāsh rahne vaale

terā bhī kahīñ patā nahīñ hai

umDā hai jo dil 'azīz' ro lo

aañsū koī roktā nahīñ hai

is wahm ki intiha nahin hai

sab kuchh hai magar KHuda nahin hai

kya is ka suragh koi pae

jis chiz ki ibtida nahin hai

khulta hi nahin fareb-e-hasti

kuchh bhi nahin aur kya nahin hai

is tarah sitam wo kar rahe hain

jaise mera KHuda nahin hai

tum KHush ho to hai mujhe nadamat

har-chand meri KHata nahin hai

dekho to nigah-e-wapsin ko

is ek nazar mein kya nahin hai

duniya ka bharam na khol ai aah

ye raaz abhi khula nahin hai

har zarra hai shahid-e-tajalli

is husn ki intiha nahin hai

sargarm-e-talash rahne wale

tera bhi kahin pata nahin hai

umDa hai jo dil 'aziz' ro lo

aansu koi rokta nahin hai