is zat ke hisar se niklunga ek roz

is zaat ke hisār se niklūñgā ek roz

patthar haTā ke ġhaar se niklūñgā ek roz

andar kī ik sadā kā mujhe intizār hai

bāhar ke intishār se niklūñgā ek roz

shāḳhoñ ke phailne se mirā qad nahīñ baḌhā

malbūs-e-barg-o-bār se niklūñgā ek roz

maiñ bel ban ke tere darīche tak ā.ūñgā

peḌoñ kī is qatār se niklūñgā ek roz

ye fāsle to terī kashish kam na kar sake

ab to tire madār se niklūñgā ek roz

ik aks huuñ aur āñsūoñ ke darmiyān huuñ

sho.ala huuñ ābshār se niklūñgā ek roz

is sang-o-ḳhisht se merī paivastagī hai aur

niklā bhī to vaqār se niklūñgā ek roz

ik raushnī kā taḳht mujhe lene aa.egā

zindān-e-tang-o-tār se niklūñgā ek roz

is zat ke hisar se niklunga ek roz

patthar haTa ke ghaar se niklunga ek roz

andar ki ek sada ka mujhe intizar hai

bahar ke intishaar se niklunga ek roz

shaKHon ke phailne se mera qad nahin baDha

malbus-e-barg-o-bar se niklunga ek roz

main bel ban ke tere dariche tak aaunga

peDon ki is qatar se niklunga ek roz

ye fasle to teri kashish kam na kar sake

ab to tere madar se niklunga ek roz

ek aks hun aur aansuon ke darmiyan hun

shoala hun aabshaar se niklunga ek roz

is sang-o-KHisht se meri paiwastagi hai aur

nikla bhi to waqar se niklunga ek roz

ek raushni ka taKHt mujhe lene aaega

zindan-e-tang-o-tar se niklunga ek roz