is zamin o aasman par KHak Dal

is zamīn o āsmāñ par ḳhaak Daal

kuchh nahīñ terā yahāñ par ḳhaak Daal

naqsh hone kī tirī sūrat hai aur

is vajūd-e-be-nishāñ par ḳhaak Daal

ḳhatm sab kuchh haar se hotā nahīñ

uTh aur ehsās-e-ziyāñ par ḳhaak Daal

dard jab samjhe tirā vo be-zabāñ

ārzū-e-ham-zabāñ par ḳhaak Daal

is makānī qaid se bāhar nikal

is zamān o lā-zamāñ par ḳhaak Daal

tū bharam hai aur na koī vahm hai

chhoḌ maayā ke jahāñ par ḳhaak Daal

in asātīrī fazāoñ se nikal

is tilism-e-dāstāñ par ḳhaak Daal

is se pahle har yaqīñ ho gard gard

har qayās aur har gumāñ par ḳhaak Daal

is zamin o aasman par KHak Dal

kuchh nahin tera yahan par KHak Dal

naqsh hone ki teri surat hai aur

is wajud-e-be-nishan par KHak Dal

KHatm sab kuchh haar se hota nahin

uTh aur ehsas-e-ziyan par KHak Dal

dard jab samjhe tera wo be-zaban

aarzu-e-ham-zaban par KHak Dal

is makani qaid se bahar nikal

is zaman o la-zaman par KHak Dal

tu bharam hai aur na koi wahm hai

chhoD maya ke jahan par KHak Dal

in asatiri fazaon se nikal

is tilism-e-dastan par KHak Dal

is se pahle har yaqin ho gard gard

har qayas aur har guman par KHak Dal