اسے گزار مگر اس پہ اعتبار نہ کر

اسے گزار مگر اس پہ اعتبار نہ کر

ہے عمر فانی اسے وجہ افتخار نہ کر

مرے سخن سے پرندے کلام کرتے ہیں

تو خامشی کو مری بے بسی شمار نہ کر

میں اپنی کھوج کے لمبے سفر پہ نکلی ہوں

پلٹ کے آؤں نہ شاید تو انتظار نہ کر

تمہاری یاد سے یہ زندگی عبارت ہے

ردائے شوق کو اے دوست تار تار نہ کر

شمار کر کے اے دل انتظار کی گھڑیاں

یہ بے قراری ابھی سے تو اختیار نہ کر

زمانہ ساتھ نہ دے پائے گا صدفؔ تیرا

تو اپنے دل کے سبھی راز آشکار نہ کر