ise guzar magar is pe eatibar na kar

ise guzār magar is pe e.atibār na kar

hai umr faanī ise vaj.h-e-iftiḳhār na kar

mire suḳhan se parinde kalām karte haiñ

tū ḳhāmushī ko mirī bebasī shumār na kar

maiñ apnī khoj ke lambe safar pe niklī huuñ

palaT ke aa.uuñ na shāyad tū intizār na kar

tumhārī yaad se ye zindagī ibārat hai

ridā-e-shauq ko ai dost tār-tār na kar

shumār kar ke ai dil intizār kī ghaḌiyāñ

ye be-qarārī abhī se to iḳhtiyār na kar

zamāna saath na de pā.egā 'sadaf' terā

tū apne dil ke sabhī raaz āshkār na kar

ise guzar magar is pe eatibar na kar

hai umr fani ise wajh-e-iftiKHar na kar

mere suKHan se parinde kalam karte hain

tu KHamushi ko meri bebasi shumar na kar

main apni khoj ke lambe safar pe nikli hun

palaT ke aaun na shayad tu intizar na kar

tumhaari yaad se ye zindagi ibarat hai

rida-e-shauq ko ai dost tar-tar na kar

shumar kar ke ai dil intizar ki ghaDiyan

ye be-qarari abhi se to iKHtiyar na kar

zamana sath na de paega 'sadaf' tera

tu apne dil ke sabhi raaz aashkar na kar