ishaare kya nigah-e-naz-e-dil-ruba ke chale

ishāre kyā nigah-e-nāz-e-dil-rubā ke chale

sitam ke tiir chale nīmche qazā ke chale

gunah kā bojh jo gardan pe ham uThā ke chale

ḳhudā ke aage ḳhajālat se sar jhukā ke chale

talab se aar hai allāh se faqīroñ ko

kahīñ jo ho gayā pherā sadā sunā ke chale

pukāre kahtī thī hasrat se na.ash āshiq kī

sanam kidhar ko hameñ ḳhaak meñ milā ke chale

misāl-e-māhī-e-be-āb maujeñ taḌpā kiiñ

habāb phuuT ke ro.e jo tum nahā ke chale

maqām yuuñ huā is kār-gāh-e-duniyā meñ

ki jaise din ko musāfir sarā meñ aa ke chale

kisī kā dil na kiyā ham ne pā.emāl kabhī

chale jo raah to chyūñTī ko bhī bachā ke chale

milā jinheñ unheñ uftādgī se auj milā

unhīñ ne khaa.ī hai Thokar jo sar uThā ke chale

'anīs' dam kā bharosa nahīñ Thahar jaao

charāġh le ke kahāñ sāmne havā ke chale

ishaare kya nigah-e-naz-e-dil-ruba ke chale

sitam ke tir chale nimche qaza ke chale

gunah ka bojh jo gardan pe hum uTha ke chale

KHuda ke aage KHajalat se sar jhuka ke chale

talab se aar hai allah se faqiron ko

kahin jo ho gaya phera sada suna ke chale

pukare kahti thi hasrat se nash aashiq ki

sanam kidhar ko hamein KHak mein mila ke chale

misal-e-mahi-e-be-ab maujen taDpa kin

habab phuT ke roe jo tum naha ke chale

maqam yun hua is kar-gah-e-duniya mein

ki jaise din ko musafir sara mein aa ke chale

kisi ka dil na kiya hum ne paemal kabhi

chale jo rah to chyunTi ko bhi bacha ke chale

mila jinhen unhen uftadgi se auj mila

unhin ne khai hai Thokar jo sar uTha ke chale

'anis' dam ka bharosa nahin Thahar jao

charagh le ke kahan samne hawa ke chale