عشق آئینۂ حیرت کے سوا کچھ بھی نہیں

عشق آئینۂ حیرت کے سوا کچھ بھی نہیں

میری صورت تری صورت کے سوا کچھ بھی نہیں

حسن کہتے ہیں جسے عشق و محبت والے

جوہر چشم بصیرت کے سوا کچھ بھی نہیں

دولت قرب ہو یا نعمت عرفان جمال

صرف اک اشک ندامت کے سوا کچھ بھی نہیں

ہجر ہو وصل ہو اے دوست عدم ہو کہ وجود

اک تری چشم عنایت کے سوا کچھ بھی نہیں

تیری ہستی کہ ندامت کے سوا سب کچھ ہے

میری فطرت کہ ندامت کے سوا کچھ بھی نہیں

حسن ظاہر ہو کہ اے آرزو حسن باطن

زلف ادراک کی نکہت کے سوا کچھ بھی نہیں