عشق عاشق کو وہ پر کیف ادا دیتا ہے

عشق عاشق کو وہ پر کیف ادا دیتا ہے

وہ جسے دیکھ لے دیوانہ بنا دیتا ہے

اس سے پہلے کہ بھریں زخم پرانے میرے

اک نیا روگ کوئی دل کو لگا دیتا ہے

بعد از مرگ پشیمان ہے میرا قاتل

اب مجھے جینے کی دن رات دعا دیتا ہے

کیسا سادہ ہے کہ مجھ ایسے کو نیکی کہہ کر

صبح دم روز وہ دریا میں بہا دیتا ہے

وقت درماں ہے تو پھر کیوں یہ گزرتا لمحہ

شدت غم کو مری اور بڑھا دیتا ہے

میں کہانی کا وہ کردار ہوں جس کو درشک

بس تھیٹر سے نکلتے ہی بھلا دیتا ہے

بس اسی بات سے روشن ہے نوازؔ اپنی جبیں

ڈھونڈھنے والوں کو کیا کچھ نہ خدا دیتا ہے