ishq ab meri jaan hai goya

'ishq ab merī jaan hai goyā

jaan ab mehmān hai goyā

soz-e-dil kah rahī hai mahfil meñ

sham' merī zabān hai goyā

jis ko dekho vahī hai garm-e-talāsh

kahīñ us kā nishān hai goyā

hai qayāmat uThān zālim kī

vo abhī se javān hai goyā

chhīne letī hai dil tirī tasvīr

vo adā hai ki jaan hai goyā

ek dil us meñ laakh zaḳhm-e-firāq

TūTā-phūTā makān hai goyā

māñge jā.eñge tujh ko ham tujh se

muñh meñ jab tak zabān hai goyā

jī bahalne ko log sunte haiñ

dard-e-dil dāstān hai goyā

aadmī vaqf-e-kār-e-duniyā hai

mehmāñ mezbān hai goyā

terī kis baat kā bharosa ho

terī har baat jaan hai goyā

dil meñ kaise vo be-takalluf haiñ

un kā apnā makān hai goyā

haa.e us ālam-āshnā kī nazar

har nazar meñ jahān hai goyā

achchhe-achchhoñ ko phāñs rakkhā hai

zāl-e-duniyā javān hai goyā

chup rahūñ maiñ to sab khaTakte haiñ

be-zabānī zabān hai goyā

bevafā.ī pe marte haiñ mā'shūq

dilrubā.ī kī shaan hai goyā

koī us par nigāh kyā Daale

tamkanat pāsbān hai goyā

terī sūrat to kahtī hai qātil

ḳhud tirā imtihān hai goyā

ḳhūb-rūyān-e-māh-paikar se

ye zamīñ āsmān hai goyā

aaj hai diid kī ijāzat-e-ām

maut kā imtihān hai goyā

vaar par vaar karte jaate haiñ

kuchh abhī mujh meñ jaan hai goyā

is suḳhan kā 'jalīl' kyā kahnā

'mus.hafī' kī zabān hai goyā

'ishq ab meri jaan hai goya

jaan ab mehman hai goya

soz-e-dil kah rahi hai mahfil mein

sham' meri zaban hai goya

jis ko dekho wahi hai garm-e-talash

kahin us ka nishan hai goya

hai qayamat uThan zalim ki

wo abhi se jawan hai goya

chhine leti hai dil teri taswir

wo ada hai ki jaan hai goya

ek dil us mein lakh zaKHm-e-firaq

TuTa-phuTa makan hai goya

mange jaenge tujh ko hum tujh se

munh mein jab tak zaban hai goya

ji bahalne ko log sunte hain

dard-e-dil dastan hai goya

aadmi waqf-e-kar-e-duniya hai

mehman mezban hai goya

teri kis baat ka bharosa ho

teri har baat jaan hai goya

dil mein kaise wo be-takalluf hain

un ka apna makan hai goya

hae us aalam-ashna ki nazar

har nazar mein jahan hai goya

achchhe-achchhon ko phans rakkha hai

zal-e-duniya jawan hai goya

chup rahun main to sab khaTakte hain

be-zabani zaban hai goya

bewafai pe marte hain ma'shuq

dilrubai ki shan hai goya

koi us par nigah kya Dale

tamkanat pasban hai goya

teri surat to kahti hai qatil

KHud tera imtihan hai goya

KHub-ruyan-e-mah-paikar se

ye zamin aasman hai goya

aaj hai did ki ijazat-e-am

maut ka imtihan hai goya

war par war karte jate hain

kuchh abhi mujh mein jaan hai goya

is suKHan ka 'jalil' kya kahna

'mushafi' ki zaban hai goya