ishq asir-e-taghayyuraat nahin

ishq asīr-e-taġhayyurāt nahīñ

ye vo din hai ki jis kī raat nahīñ

paas jab tum nahīñ hayāt nahīñ

mujh ko ehsās-e-kā.enāt nahīñ

ishq kī zindagī meñ ġham hī sahī

sādgī hai takallufāt nahīñ

etibār-e-nazar baḌhā jab se

e.atibār-e-tajalliyāt nahīñ

iltifāt-e-nazar to hai lekin

ab vo andāz-e-iltifāt nahīñ

tum har ik rang meñ ho jalva-numā

koī qaid-e-ta.a.yyunāt nahīñ

kitne parde nazar ke haa.il haiñ

ab yaqīn-e-mushāhidāt nahīñ

aise zauq-e-nazar kī kyā hastī

gar shu.ūr-e-tajalliyāt nahīñ

yuuñ chhupātā huuñ dard-e-dil un se

jaise ye un ke dil kī baat nahīñ

maiñ agar tark-e-ārzū kar duuñ

phir koī maqsad-e-hayāt nahīñ

ye havā.eñ ye phuul ye kaliyāñ

har nazar ke tasarrufāt nahīñ

'sājid' apnā ye sajda-e-maqbūl

kuchh ye qaid-e-ta.ayyunnāt nahīñ

ishq asir-e-taghayyuraat nahin

ye wo din hai ki jis ki raat nahin

pas jab tum nahin hayat nahin

mujh ko ehsas-e-kaenat nahin

ishq ki zindagi mein gham hi sahi

sadgi hai takallufat nahin

etibar-e-nazar baDha jab se

eatibar-e-tajalliyat nahin

iltifat-e-nazar to hai lekin

ab wo andaz-e-iltifat nahin

tum har ek rang mein ho jalwa-numa

koi qaid-e-tayyunat nahin

kitne parde nazar ke hail hain

ab yaqin-e-mushahidat nahin

aise zauq-e-nazar ki kya hasti

gar shuur-e-tajalliyat nahin

yun chhupata hun dard-e-dil un se

jaise ye un ke dil ki baat nahin

main agar tark-e-arzu kar dun

phir koi maqsad-e-hayat nahin

ye hawaen ye phul ye kaliyan

har nazar ke tasarrufat nahin

'sajid' apna ye sajda-e-maqbul

kuchh ye qaid-e-tayyunnat nahin