عشق اسیر تغیرات نہیں

عشق اسیر تغیرات نہیں

یہ وہ دن ہے کہ جس کی رات نہیں

پاس جب تم نہیں حیات نہیں

مجھ کو احساس کائنات نہیں

عشق کی زندگی میں غم ہی سہی

سادگی ہے تکلفات نہیں

اعتبار نظر بڑھا جب سے

اعتبار تجلیات نہیں

التفات نظر تو ہے لیکن

اب وہ انداز التفات نہیں

تم ہر اک رنگ میں ہو جلوہ نما

کوئی قید تعینات نہیں

کتنے پردے نظر کے حائل ہیں

اب یقین مشاہدات نہیں

ایسے ذوق نظر کی کیا ہستی

گر شعور تجلیات نہیں

یوں چھپاتا ہوں درد دل ان سے

جیسے یہ ان کے دل کی بات نہیں

میں اگر ترک آرزو کر دوں

پھر کوئی مقصد حیات نہیں

یہ ہوائیں یہ پھول یہ کلیاں

ہر نظر کے تصرفات نہیں

ساجدؔ اپنا یہ سجدۂ مقبول

کچھ یہ قید تعینات نہیں