عشق بتان دیر نے دیوانہ کر دیا

عشق بتان دیر نے دیوانہ کر دیا

دونوں جہان سے مجھے بیگانہ کر دیا

دل نے غضب کیا مجھے دیوانہ کر دیا

شمع جمال یار کا پروانہ کر دیا

الجھن شب فراق رہی تا سحر مجھے

غیروں نے ان کی زلف میں جب شانہ کر دیا

اس برق وش نے آنکھ ملا کر ستم کیا

لبریز میری عمر کا پیمانہ کر دیا

ساقی کو مجھ سے رند نے لاکھوں دعائیں دیں

لبریز مے سے جب مرا پیمانہ کر دیا

مجھ بادہ کش کا شیشۂ دل چور ہو گیا

سو ٹکڑے محتسب نے جو پیمانہ کر دیا

کیا آج کوئی رند قدح نوش مر گیا

ساقی نے بند جو در مے خانہ کر دیا

وہ رند بادہ کش ہوں کہ جب سے شراب پی

ساقی عروج پر ترا مے خانہ کر دیا

جام و خم و سبو کو قیامت کی دی شکست

ویران تیری چشم نے مے خانہ کر دیا

کیا اب کے سال آئی ہے زوروں پہ فصل گل

ساقی نے وقف عام جو مے خانہ کر دیا

بل کی جو مجھ سے لینے لگی زلف پر شکن

شانہ بنا کے دل کا وہیں شانہ کر دیا

دشت جنوں میں چنتا ہوں تنکے بسان قیس

سودائے زلف نے مجھے دیوانہ کر دیا

رونق فزا جو وصل کی شب میں ہوا وہ ماہ

پر نور آتے ہی مرا کاشانہ کر دیا

بنت العنب کی آنکھ تھی جادو بھری ہوئی

زاہد کو اک نگاہ میں دیوانہ کر دیا

دل میں بتان دیر کو کیوں دی جگہ وفاؔ

کعبہ تھا جس کا نام اسے بت خانہ کر دیا