ishq-e-butan ka le ke sahaara kabhi kabhi

ishq-e-butāñ kā le ke sahārā kabhī kabhī

apne ḳhudā ko ham ne pukārā kabhī kabhī

is intihā-e-tark-e-ta.alluq ke bāvajūd

ham ne liyā hai naam tumhārā kabhī kabhī

tūfāñ kā ḳhauf hai abhī shāyad karishma-kār

aatā hai sāmne jo kināra kabhī kabhī

bahke to mai-kade meñ namāzoñ pe aa ga.e

yuuñ āqibat ko ham ne sañvārā kabhī kabhī

tanhā-ravī ne rakkhī hamāre junūñ kī laaj

go ahl-e-kārvāñ ne pukārā kabhī kabhī

ab kyā kaheñ dil-e-mutalavvin-mizāj ko

aksar ye aap kā hai hamārā kabhī kabhī

fariyād-e-ġham se 'arsh' sañbhaltā hai dil magar

lete haiñ ahl-e-dil ye sahārā kabhī kabhī

ishq-e-butan ka le ke sahaara kabhi kabhi

apne KHuda ko hum ne pukara kabhi kabhi

is intiha-e-tark-e-talluq ke bawajud

hum ne liya hai nam tumhaara kabhi kabhi

tufan ka KHauf hai abhi shayad karishma-kar

aata hai samne jo kinara kabhi kabhi

bahke to mai-kade mein namazon pe aa gae

yun aaqibat ko hum ne sanwara kabhi kabhi

tanha-rawi ne rakkhi hamare junun ki laj

go ahl-e-karwan ne pukara kabhi kabhi

ab kya kahen dil-e-mutalawwin-mizaj ko

aksar ye aap ka hai hamara kabhi kabhi

fariyaad-e-gham se 'arsh' sanbhalta hai dil magar

lete hain ahl-e-dil ye sahaara kabhi kabhi