ishq-e-sadiq ne dikhaya ye asar aap se aap

ishq-e-sādiq ne dikhāyā ye asar aap se aap

ho ga.ī un ko mire dil kī ḳhabar aap se aap

chashm-e-jānāñ kī agar yaad nahīñ aa.ī hai

aa ga.e josh pe kyoñ dīda-e-tar aap se aap

kuchh maza paḌ gayā hai un ko ki be-vaj.h-o-sabab

vasl kī shab vo kiyā karte haiñ shar aap se aap

ḳhufta-baḳhtī mirī dikhlātī hai tāsīr apnī

bajne lagtā hai shab-e-vasl gajar aap se aap

na mo.azzin ne azaañ dī na abhī top chalī

daf.atan bol uThā murġh-e-sahar aap se aap

ba-ḳhudā un kī taraf se nahīñ kuchh ḳhvāhish thī

jaan kā apnī kiyā ham ne zarar aap se aap

ġhair ko tum ne biThāyā to nahīñ pahlū meñ

aaj uThtā hai ye kyoñ dard-e-jigar aap se aap

jazb-e-ulfat tirī tāsīr kā tab qaa.il huuñ

deñ to vo bosa-e-lab mujh ko magar aap se aap

lillāh al-hamd kiyā aah ne itnā to asar

be-talab vo chale aa.e mire ghar aap se aap

hogī tāsīr jo nāloñ meñ tumhāre 'vahbī'

to chalā aa.egā vo rashk-e-qamar aap se aap

ishq-e-sadiq ne dikhaya ye asar aap se aap

ho gai un ko mere dil ki KHabar aap se aap

chashm-e-jaanan ki agar yaad nahin aai hai

aa gae josh pe kyon dida-e-tar aap se aap

kuchh maza paD gaya hai un ko ki be-wajh-o-sabab

wasl ki shab wo kiya karte hain shar aap se aap

KHufta-baKHti meri dikhlati hai tasir apni

bajne lagta hai shab-e-wasl gajar aap se aap

na moazzin ne azan di na abhi top chali

dafatan bol uTha murgh-e-sahar aap se aap

ba-KHuda un ki taraf se nahin kuchh KHwahish thi

jaan ka apni kiya hum ne zarar aap se aap

ghair ko tum ne biThaya to nahin pahlu mein

aaj uThta hai ye kyon dard-e-jigar aap se aap

jazb-e-ulfat teri tasir ka tab qail hun

den to wo bosa-e-lab mujh ko magar aap se aap

lillah al-hamd kiya aah ne itna to asar

be-talab wo chale aae mere ghar aap se aap

hogi tasir jo nalon mein tumhaare 'wahbi'

to chala aaega wo rashk-e-qamar aap se aap