ishq-e-sadiq un ko bhi kar de na diwana kahin

ishq-e-sādiq un ko bhī kar de na dīvāna kahīñ

sham.a jalte jalte ban jaa.e na parvāna kahīñ

kah na de rind-e-subū-kash rāz-e-mai-ḳhāna kahīñ

mohtasib bhī sun ke ho jaa.e na mastāna kahīñ

mastiyāñ chhā.ī huī haiñ mai-kada meñ chār-sū

jalva-e-sāqī kahīñ hai daur-e-paimāna kahīñ

josh-e-vahshat baḌhte baḌhte ho na jaa.e parda-dar

ḳhalq meñ mash.hūr ho merā na afsāna kahīñ

chashm-e-mast-e-sāqī-e-maḳhmūr hai mai-kash-navāz

bhar na jaa.e umr-e-do-roza kā paimāna kahīñ

mai-parastī kā mazā aa.e nasha baḌhtā rahe

aaj saaqī de jo paimāne pe paimāna kahīñ

kaan us āvāz-e-dilkash se hoñ kyūñkar āshnā

ġham-kada merā kahīñ un kā tarab-ḳhāna kahīñ

sun ke mere jazba-e-vahshat ko vo kahne lage

nazr-e-shauq-e-dīd ho jaa.e na dīvāna kahīñ

zabt lāzim hai tumheñ 'kaukab' faroġh-e-ishq meñ

har-kas-o-nā-kas se kah denā na afsāna kahīñ

ishq-e-sadiq un ko bhi kar de na diwana kahin

shama jalte jalte ban jae na parwana kahin

kah na de rind-e-subu-kash raaz-e-mai-KHana kahin

mohtasib bhi sun ke ho jae na mastana kahin

mastiyan chhai hui hain mai-kada mein chaar-su

jalwa-e-saqi kahin hai daur-e-paimana kahin

josh-e-wahshat baDhte baDhte ho na jae parda-dar

KHalq mein mashhur ho mera na afsana kahin

chashm-e-mast-e-saqi-e-maKHmur hai mai-kash-nawaz

bhar na jae umr-e-do-roza ka paimana kahin

mai-parasti ka maza aae nasha baDhta rahe

aaj saqi de jo paimane pe paimana kahin

kan us aawaz-e-dilkash se hon kyunkar aashna

gham-kada mera kahin un ka tarab-KHana kahin

sun ke mere jazba-e-wahshat ko wo kahne lage

nazr-e-shauq-e-did ho jae na diwana kahin

zabt lazim hai tumhein 'kaukab' farogh-e-ishq mein

har-kas-o-na-kas se kah dena na afsana kahin