ishq gar hath chhuDae to chhuDane dena

'ishq gar haath chhuḌā.e to chhuḌāne denā

kār-e-vahshat pe magar aañch na aane denā

yuuñ bhī āġhāz meñ har kaam bhalā lagtā hai

avval avval hai ise hijr manāne denā

apne bachche ko na nafrat kā paḌhā denā sabaq

haath dushman se milā.e to milāne denā

ye bhī kam-zarf mohabbat kā vatīra hai miyāñ

jab na.e zaḳhm kī ḳhvāhish ho purāne denā

jis ne dāman mirā dukh dard se bhar Daalā hai

mere maulā use ḳhushiyoñ ke ḳhazāne denā

'izzat-e-nafs se baḌh kar to koī chiiz nahīñ

jo tumheñ chhoḌ ke jaa.e use jaane denā

'ishq gar hath chhuDae to chhuDane dena

kar-e-wahshat pe magar aanch na aane dena

yun bhi aaghaz mein har kaam bhala lagta hai

awwal awwal hai ise hijr manane dena

apne bachche ko na nafrat ka paDha dena sabaq

hath dushman se milae to milane dena

ye bhi kam-zarf mohabbat ka watira hai miyan

jab nae zaKHm ki KHwahish ho purane dena

jis ne daman mera dukh dard se bhar Dala hai

mere maula use KHushiyon ke KHazane dena

'izzat-e-nafs se baDh kar to koi chiz nahin

jo tumhein chhoD ke jae use jaane dena