ishq hai banda-e-azad ka maqsud-e-hayat

ishq hai banda-e-āzād kā maqsūd-e-hayāt

aql-e-but-gar ne tarāshe haiñ hazāroñ ma.abūd

vus.ateñ aur atā arsa-e-āfāq ko kar

tang hai mere junūñ pe ye jahān-e-mahdūd

fauqiyat dete haiñ maz.hab pe jo qaumiyyat ko

un kā idrāk mo.attal hai basīrat mahdūd

ab kahāñ husn-e-ḳhud-ārā meñ ḳham-e-zulf-e-ayāz

ab kahāñ ishq ke maslak meñ tarīq-e-mahmūd

na vo manzil-gah-e-majnūñ hai na vo vādī-e-najd

rah-rav-e-shauq-o-tamanna kī haiñ rāheñ masdūd

zehn meñ un ke kahāñ sho.ala-e-taḳhlīq-e-suḳhan

jo ye kahte haiñ ki afkār pe taarī hai jumūd

sham.a-e-aivān-e-tarab qismat-e-mun.im 'fārūq'

dil-e-majbūr kī taqdīr faqat sho.ala-e-dūd

ishq hai banda-e-azad ka maqsud-e-hayat

aql-e-but-gar ne tarashe hain hazaron mabud

wusaten aur ata arsa-e-afaq ko kar

tang hai mere junun pe ye jahan-e-mahdud

fauqiyat dete hain mazhab pe jo qaumiyyat ko

un ka idrak moattal hai basirat mahdud

ab kahan husn-e-KHud-ara mein KHam-e-zulf-e-ayaz

ab kahan ishq ke maslak mein tariq-e-mahmud

na wo manzil-gah-e-majnun hai na wo wadi-e-najd

rah-raw-e-shauq-o-tamanna ki hain rahen masdud

zehn mein un ke kahan shoala-e-taKHliq-e-suKHan

jo ye kahte hain ki afkar pe tari hai jumud

shama-e-aiwan-e-tarab qismat-e-munim 'faruq'

dil-e-majbur ki taqdir faqat shoala-e-dud