ishq ho jaun pyar ho jaun

ishq ho jā.ūñ pyaar ho jā.ūñ

maiñ jo ḳhushbu-e-yār ho jā.ūñ

jab bhī niklūñ maiñ DhūñDne us ko

dhuul miTTī ġhubār ho jā.ūñ

us ke va.ade kā e'tibār karūñ

phir shab-e-intizār ho jā.ūñ

oḌh luuñ us kī yaad kī chādar

aur ḳhud par nisār ho jā.ūñ

maiñ tirā mausam-e-ḳhizāñ pahnūñ

aur fasl-e-bahār ho jā.ūñ

ek shab us ko is tarah dekhūñ

dāman-e-shab ke paar ho jā.ūñ

jo havā tujh ko chhū ke aa.e maiñ

us ko chhū luuñ bahār ho jā.ūñ

jis ghaḌī us kā aa.ina dekhūñ

us ghaḌī aks-e-yār ho jā.ūñ

phuul Tāñkūñ libās meñ us ke

maiñ agar dastkār ho jā.ūñ

us kā kājal lagā ke āñkhoñ meñ

mastī-e-chashm-e-yār ho jā.ūñ

chāhtā vo bhī hai yahī 'afroz'

aag pī luuñ sharār ho jā.ūñ

ishq ho jaun pyar ho jaun

main jo KHushbu-e-yar ho jaun

jab bhi niklun main DhunDne us ko

dhul miTTi ghubar ho jaun

us ke wade ka e'tibar karun

phir shab-e-intizar ho jaun

oDh lun us ki yaad ki chadar

aur KHud par nisar ho jaun

main tera mausam-e-KHizan pahnun

aur fasl-e-bahaar ho jaun

ek shab us ko is tarah dekhun

daman-e-shab ke par ho jaun

jo hawa tujh ko chhu ke aae main

us ko chhu lun bahaar ho jaun

jis ghaDi us ka aaina dekhun

us ghaDi aks-e-yar ho jaun

phul Tankun libas mein us ke

main agar dastkar ho jaun

us ka kajal laga ke aankhon mein

masti-e-chashm-e-yar ho jaun

chahta wo bhi hai yahi 'afroz'

aag pi lun sharar ho jaun