ishq hota hai jaan-lewa bhi

'ishq hotā hai jān-levā bhī

ai mire yaar tū ne sochā bhī

tum ne chehra to apnā dekh liyā

kyā huā aa.ina jo TuuTā bhī

dast-e-farzāngī meñ patthar the

maiñ ne dekhā hai ye tamāshā bhī

hai jo shikva-guzār-e-sāya-e-zulf

zulf ke saa.e meñ vo Thahrā bhī

ghar meñ rahnā bhī ab nahīñ āsāñ

aur hai band rāh-e-sahrā bhī

hai bahut mujh ko 'umr-bhar ke liye

terī chāhat kā ek lamha bhī

apnī hī raushnī meñ chaltā huuñ

saath chaltā hai merā saayā bhī

ham to sau baar tark-e-'ishq kareñ

sar se nikle magar ye saudā bhī

dekh 'bāsit-azīm' jhuuT na bol

kahīñ hotā hai yaar aisā bhī

'ishq hota hai jaan-lewa bhi

ai mere yar tu ne socha bhi

tum ne chehra to apna dekh liya

kya hua aaina jo TuTa bhi

dast-e-farzangi mein patthar the

main ne dekha hai ye tamasha bhi

hai jo shikwa-guzar-e-saya-e-zulf

zulf ke sae mein wo Thahra bhi

ghar mein rahna bhi ab nahin aasan

aur hai band rah-e-sahra bhi

hai bahut mujh ko 'umr-bhar ke liye

teri chahat ka ek lamha bhi

apni hi raushni mein chalta hun

sath chalta hai mera saya bhi

hum to sau bar tark-e-'ishq karen

sar se nikle magar ye sauda bhi

dekh 'basit-azim' jhuT na bol

kahin hota hai yar aisa bhi