ishq itna kamal rakhta hai

ishq itnā kamāl rakhtā hai

husn ko ġham-shanās kartā hai

chashm-e-sāqī meñ jām-e-jam kī qasam

rañg-e-duniyā-o-dīñ chhalaktā hai

sham-e-mahfil ho yā ki parvāna

vo bhī jaltī hai ye bhī jaltā hai

Duub jaa.e na ġham kā mai-ḳhāna

jām-e-qalb-e-hazīñ chhalaktā hai

bas ai fitna-e-ḳhirām-e-nāz Thahar

ab qayāmat kā dil machaltā hai

maslahat ye hai tum badal jaao

rañg-e-mahfil agar badaltā hai

ġham-e-jānāñ se bach ga.e 'iqbāl'

ġham-e-daurāñ se kaun bachtā hai

ishq itna kamal rakhta hai

husn ko gham-shanas karta hai

chashm-e-saqi mein jam-e-jam ki qasam

rang-e-duniya-o-din chhalakta hai

sham-e-mahfil ho ya ki parwana

wo bhi jalti hai ye bhi jalta hai

Dub jae na gham ka mai-KHana

jam-e-qalb-e-hazin chhalakta hai

bas ai fitna-e-KHiram-e-naz Thahar

ab qayamat ka dil machalta hai

maslahat ye hai tum badal jao

rang-e-mahfil agar badalta hai

gham-e-jaanan se bach gae 'iqbaal'

gham-e-dauran se kaun bachta hai