عشق جس شخص کو دیوانہ بنا دیتا ہے

عشق جس شخص کو دیوانہ بنا دیتا ہے

پھر وہ قاروں کا خزانہ بھی لٹا دیتا ہے

ہم وہ وحشی جنہیں کھنڈر بھی لگاتے ہیں گلے

ہم وہ صحرائی جنہیں دشت دعا دیتا ہے

تم اگر چاہو تو پھر اس سے تکلم کرنا

مختصر وقت میں تفصیل بتا دیتا ہے

اس لئے وصل کی خواہش ہی نہیں کی میں نے

ہجر جتنا بھی پرانا ہو مزا دیتا ہے

پہلے خاموش نگاہوں سے سخن کرتا ہے

اور پھر جلتے چراغوں کو بجھا دیتا ہے

یاد رکھنا بھی اذیت کا سبب ہے جامیؔ

بھول جانے کی بھی وہ سخت سزا دیتا ہے