ishq jis shaKHs ko diwana bana deta hai

ishq jis shaḳhs ko dīvāna banā detā hai

phir vo qārūñ kā ḳhazāna bhī luTā detā hai

ham vo vahshī jinheñ khanDar bhī lagāte haiñ gale

ham vo sahrā.ī jinheñ dasht duā detā hai

tum agar chāho to phir us se takallum karnā

muḳhtasar vaqt meñ tafsīl batā detā hai

is liye vasl kī ḳhvāhish hī nahīñ kī maiñ ne

hijr jitnā bhī purānā ho mazā detā hai

pahle ḳhāmosh nigāhoñ se suḳhan kartā hai

aur phir jalte charāġhoñ ko bujhā detā hai

yaad rakhnā bhī aziyyat kā sabab hai 'jāmī'

bhuul jaane kī bhī vo saḳht sazā detā hai

ishq jis shaKHs ko diwana bana deta hai

phir wo qarun ka KHazana bhi luTa deta hai

hum wo wahshi jinhen khanDar bhi lagate hain gale

hum wo sahrai jinhen dasht dua deta hai

tum agar chaho to phir us se takallum karna

muKHtasar waqt mein tafsil bata deta hai

is liye wasl ki KHwahish hi nahin ki main ne

hijr jitna bhi purana ho maza deta hai

pahle KHamosh nigahon se suKHan karta hai

aur phir jalte charaghon ko bujha deta hai

yaad rakhna bhi aziyyat ka sabab hai 'jami'

bhul jaane ki bhi wo saKHt saza deta hai