عشق کا بھاؤ ایسے بڑھاتی غزل

عشق کا بھاؤ ایسے بڑھاتی غزل

ہاتھ آتی نہیں بھاؤ کھاتی غزل

میرے ہر شعر میں آپ کا ذکر ہے

میرے ہر شعر میں مسکراتی غزل

میرے دل کے محلے کی زینت بنی

روز آتی غزل روز جاتی غزل

تم ہی معشوق ہو تم ہی محبوب ہو

تم ہی جان غزل ہو بتاتی غزل

ہر زمانہ میں کھٹکی زمانہ کو یہ

ہر زمانہ کو آنکھیں دکھاتی غزل

زندگی میں مری روشنی کے لیے

چاند بن کر مری چھت پہ آتی غزل

عشق میں اس کے مجنوں ہیں غالبؔ بھی ہیں

کیا سے کیا آدمی کو بناتی غزل

تب کہیں جا کے آتا غزل میں نکھار

خون دل جب کسی کو رلاتی غزل

یہ غزل گوئی آسان ہرگز نہیں

ہاتھ مشکل سے راشدؔ یہ آتی غزل