عشق کا دریا ہوا سیراب کیا

عشق کا دریا ہوا سیراب کیا

آگ کی زد میں ہے اب کے آب کیا

اس کی خوشبو سے بدن جلنے لگا

پی لیا ہے پھول نے تیزاب کیا

آنکھ سے کرنیں لگیں ہیں پھوٹنے

دل میں اترا ہے کوئی مہتاب کیا

چن رہی ہیں آنکھیں دونوں ہاتھ سے

ریت پر بکھرے ہوئے ہیں خواب کیا

آ رہے ہیں جھونکے اس کے عکس کے

دید کا کھولا ہے اس نے باب کیا

کچھ الگ ہی رقص ہے گرداب میں

ہو گیا ارماں کوئی غرقاب کیا

وجد طاری کر رہی ہے گفتگو

حرف تیرے ہو گئے مضراب کیا

یوں دھڑک اٹھی زمیں شہبازؔ کیوں

رکھ دیا تو نے دل بیتاب کیا