عشق کا کام بخت سازی ہے

عشق کا کام بخت سازی ہے

اس کی ہر بات امتیازی ہے

دل گدازیٔ غم کا غم کیا ہو

غم کی فطرت ہی دل گدازی ہے

ہر قدم پر یہ کثرت جلوہ

اہتمام نظر نوازی ہے

جس کو کہتے ہیں انقلاب حیات

اک جنوں کی کرشمہ سازی ہے

اس میں کیا آئے بو حقیقت کی

جو مجازی ہے وہ مجازی ہے

لاکھ ارماں سہی مگر اے دل

عشق بازی پھر عشق بازی ہے

سچ تو یہ ہے کہ اک بڑی نعمت

نگہ‌ و دل کی پاک بازی ہے

رنگ یا حسن کی حقیقت کیا

سب نظر کی فسوں طرازی ہے

فیض اقبالؔ ہے جو منشاؔ کا

نغمہ ہندی ہے لے حجازی ہے