ishq ka kaam baKHt-sazi hai

ishq kā kaam baḳht-sāzī hai

is kī har baat imtiyāzī hai

dil-gudāzī-e-ġham kā ġham kyā ho

ġham kī fitrat hī dil-gudāzī hai

har qadam par ye kasrat-e-jalva

ehtimām-e-nazar-navāzī hai

jis ko kahte haiñ inqalāb-e-hayāt

ik junūñ kī karishma-sāzī hai

us meñ kyā aa.e bū haqīqat kī

jo majāzī hai vo majāzī hai

laakh armāñ sahī magar ai dil

ishq-bāzī phir ishq-bāzī hai

sach to ye hai ki ik baḌī ne.amat

nigah-o-dil kī pāk-bāzī hai

rang yā husn kī haqīqat kyā

sab nazar kī fusūñ-tarāzī hai

faiz-e-'iqbāl' hai jo 'manshā' kā

naġhma hindī hai lai hijāzī hai

ishq ka kaam baKHt-sazi hai

is ki har baat imtiyazi hai

dil-gudazi-e-gham ka gham kya ho

gham ki fitrat hi dil-gudazi hai

har qadam par ye kasrat-e-jalwa

ehtimam-e-nazar-nawazi hai

jis ko kahte hain inqalab-e-hayat

ek junun ki karishma-sazi hai

us mein kya aae bu haqiqat ki

jo majazi hai wo majazi hai

lakh arman sahi magar ai dil

ishq-bazi phir ishq-bazi hai

sach to ye hai ki ek baDi neamat

nigah-o-dil ki pak-bazi hai

rang ya husn ki haqiqat kya

sab nazar ki fusun-taraazi hai

faiz-e-'iqbaal' hai jo 'mansha' ka

naghma hindi hai lai hijazi hai