ishq ka mara na sahra hi mein kuchh chaupaT paDa

ishq kā maarā na sahrā hī meñ kuchh chaupaT paḌā

hai jahāñ us kā amal vo shahr bhī hai paT paḌā

āshiqoñ ke qatl ko kyā tez hai abrū kī teġh

Tuk udhar jumbish huī aur sar idhar se kaT paḌā

ashk kī nok-e-mizha par shīsha-bāzī dekhiye

kyā kalā.eñ kheltā hai baañs par ye naT paḌā

shāyad us ġhuncha-dahan ko hañste dekhā baaġh meñ

ab talak ġhuncha balā.eñ letā hai chaT chaT paḌā

dekh kar us ke sarāpā ko ye kahtī hai parī

sar se le kar paañv tak yaañ husn aa kar phaT paḌā

kyā tamāshā hai ki vo chanchal haTīlā chulbulā

aur se to hiT gayā par mere dil par haT paḌā

kyā huā go mar gayā farhād lekin dosto

be-sutūñ par ho rahā hai aaj tak khaT khaT paḌā

hijr kī shab meñ jo khīñchī aan kar naale ne teġh

kī paTe-bāzī vale tāsīr se haT haT paḌā

dil baḌhā kar us meñ khīñchā aah ne phir nīmcha

ai 'nazīr' āḳhir vo us kā nīmcha bhī paT paḌā

ishq ka mara na sahra hi mein kuchh chaupaT paDa

hai jahan us ka amal wo shahr bhi hai paT paDa

aashiqon ke qatl ko kya tez hai abru ki tegh

Tuk udhar jumbish hui aur sar idhar se kaT paDa

ashk ki nok-e-mizha par shisha-bazi dekhiye

kya kalaen khelta hai bans par ye naT paDa

shayad us ghuncha-dahan ko hanste dekha bagh mein

ab talak ghuncha balaen leta hai chaT chaT paDa

dekh kar us ke sarapa ko ye kahti hai pari

sar se le kar panw tak yan husn aa kar phaT paDa

kya tamasha hai ki wo chanchal haTila chulbula

aur se to hiT gaya par mere dil par haT paDa

kya hua go mar gaya farhad lekin dosto

be-sutun par ho raha hai aaj tak khaT khaT paDa

hijr ki shab mein jo khinchi aan kar nale ne tegh

ki paTe-bazi wale tasir se haT haT paDa

dil baDha kar us mein khincha aah ne phir nimcha

ai 'nazir' aaKHir wo us ka nimcha bhi paT paDa