ishq ka markaz hai jo us laDke ko lae koi

'ishq kā markaz hai jo us laḌke ko laa.e koī

kab talak pāgal phiregī laḌkī batlā.e koī

us ke vā'de us kī yādeñ sab haiñ is dil meñ rakhe

ab hai dhaḌkā is tijorī ko na le jaa.e koī

us se hī haiñ saare mausam us kā muskānā bahār

khul ke vo hañs de kabhī aur megh barsā.e koī

phir tirī āvāz ke dhoke meñ khiḌkī tak ga.e

jhāñk kar dekhā parinda rāgnī gaa.e koī

āñkheñ satrañgī haiñ us kī gul-mohar se lab bane

muskurāhaT vo nasha jogan bahak jaa.e koī

sah nahīñ paa.e azāb-e-hijr ye hai aur baat

is gunāh-e-ishq par lekin na pachhtā.e koī

ye adab kā hai maqām ab rahne de ye mashvare

'aql lāzim hai ḳhamoshī dil ko jab bhaa.e koī

zindagī dil kī to hai muhtāj bas is ek kī

varna yuuñ to chāhe jitne 'ishq farmā.e koī

mar chukī haiñ Tahniyāñ jo suukh kar laao idhar

mere hāthoñ meñ hai miTTī paanī barsā.e koī

din Dhalegā raat hogī ham guzarte jā.eñge

aa.e the kyoñ jā.eñge kyoñ ham ko samjhā.e koī

'ishq ka markaz hai jo us laDke ko lae koi

kab talak pagal phiregi laDki batlae koi

us ke wa'de us ki yaaden sab hain is dil mein rakhe

ab hai dhaDka is tijori ko na le jae koi

us se hi hain sare mausam us ka muskana bahaar

khul ke wo hans de kabhi aur megh barsae koi

phir teri aawaz ke dhoke mein khiDki tak gae

jhank kar dekha parinda ragni gae koi

aankhen satrangi hain us ki gul-mohar se lab bane

muskurahaT wo nasha jogan bahak jae koi

sah nahin pae azab-e-hijr ye hai aur baat

is gunah-e-ishq par lekin na pachhtae koi

ye adab ka hai maqam ab rahne de ye mashware

'aql lazim hai KHamoshi dil ko jab bhae koi

zindagi dil ki to hai muhtaj bas is ek ki

warna yun to chahe jitne 'ishq farmae koi

mar chuki hain Tahniyan jo sukh kar lao idhar

mere hathon mein hai miTTi pani barsae koi

din Dhalega raat hogi hum guzarte jaenge

aae the kyon jaenge kyon hum ko samjhae koi