ishq ka wahm hai zamane par

ishq kā vahm hai zamāne par

kyā bigaḌte haiñ vo fasāne par

madad-e-shauq se pahuñchtā huuñ

tiir se pahle maiñ nishāne par

tum to aise bigaḌ ga.e ki panāh

ġhair ko bazm meñ banāne par

aap āñkheñ mujhe dikhāte haiñ

ek zaḳhm-e-jigar dikhāne par

un ke jaane se jī hī chhūT gayā

naaz thā ham ko dil lagāne par

hosh aatā hai jaan jaatī hai

in hasīnoñ ke āne-jāne par

yuuñ na Thukrā ham ab to baiTh rahe

rakh ke sar tere āstāne par

merī qismat meñ thā ki ashk piyūñ

muhr hotī hai daane daane par

ai 'zakī' kis balā kā hai andāz

aaj zulf us kī vā hai shāne par

ishq ka wahm hai zamane par

kya bigaDte hain wo fasane par

madad-e-shauq se pahunchta hun

tir se pahle main nishane par

tum to aise bigaD gae ki panah

ghair ko bazm mein banane par

aap aankhen mujhe dikhate hain

ek zaKHm-e-jigar dikhane par

un ke jaane se ji hi chhuT gaya

naz tha hum ko dil lagane par

hosh aata hai jaan jati hai

in hasinon ke aane-jaane par

yun na Thukra hum ab to baiTh rahe

rakh ke sar tere aastane par

meri qismat mein tha ki ashk piyun

muhr hoti hai dane dane par

ai 'zaki' kis bala ka hai andaz

aaj zulf us ki wa hai shane par