عشق کا وہم ہے زمانے پر

عشق کا وہم ہے زمانے پر

کیا بگڑتے ہیں وہ فسانے پر

مدد شوق سے پہنچتا ہوں

تیر سے پہلے میں نشانے پر

تم تو ایسے بگڑ گئے کہ پناہ

غیر کو بزم میں بنانے پر

آپ آنکھیں مجھے دکھاتے ہیں

ایک زخم جگر دکھانے پر

ان کے جانے سے جی ہی چھوٹ گیا

ناز تھا ہم کو دل لگانے پر

ہوش آتا ہے جان جاتی ہے

ان حسینوں کے آنے جانے پر

یوں نہ ٹھکرا ہم اب تو بیٹھ رہے

رکھ کے سر تیرے آستانے پر

میری قسمت میں تھا کہ اشک پیوں

مہر ہوتی ہے دانے دانے پر

اے ذکیؔ کس بلا کا ہے انداز

آج زلف اس کی وا ہے شانے پر