ishq karte hain to ahl-e-ishq yun sauda karen

ishq karte haiñ to ahl-e-ishq yuuñ saudā kareñ

hosh kā sarmāya nazr-e-husn-e-be-parvā kareñ

ham na hoñ lekin zamāne meñ hamārā naam ho

aisī hastī chāhiye to mar ke ham paidā kareñ

hai ḳhud-ārā.ī kisī kī shān-e-ḳhuddārī ke saath

yaanī un ko ham na dekheñ vo hameñ dekhā kareñ

dars-e-irfāñ ke liye har zarra hai tūr-e-kalīm

dekhne vaale magar pahle nazar paidā kareñ

sheḳh ko jannat mubārak ham ko dozaḳh hai qubūl

fikr-e-uqbā vo kareñ ham ḳhidamt-e-duniyā kareñ

ek dil hai ek hasrat ek ham haiñ ek tum

itne ġham kam haiñ jo koī aur ġham paidā kareñ

'ahsan'-e-ranjūr ko duniyā se kyā hai vāsta

aap ne bīmār Daalā aap hī achchhā kareñ

ishq karte hain to ahl-e-ishq yun sauda karen

hosh ka sarmaya nazr-e-husn-e-be-parwa karen

hum na hon lekin zamane mein hamara nam ho

aisi hasti chahiye to mar ke hum paida karen

hai KHud-arai kisi ki shan-e-KHuddari ke sath

yani un ko hum na dekhen wo hamein dekha karen

dars-e-irfan ke liye har zarra hai tur-e-kalim

dekhne wale magar pahle nazar paida karen

sheKH ko jannat mubarak hum ko dozaKH hai qubul

fikr-e-uqba wo karen hum KHidamt-e-duniya karen

ek dil hai ek hasrat ek hum hain ek tum

itne gham kam hain jo koi aur gham paida karen

'ahsan'-e-ranjur ko duniya se kya hai wasta

aap ne bimar Dala aap hi achchha karen