ishq ke eajaz se taskin ka saman ho gain

ishq ke e.ajāz se taskīñ kā sāmāñ ho ga.iiñ

ab jafā.eñ bhī navāzish-hā-e-pinhāñ ho ga.iiñ

apnī āzādī pe nāzāñ haiñ abas vo bulbuleñ

jo qafas se duur pāband-e-gulistāñ ho ga.iiñ

ab faqat terā tasavvur hai ki dil ke sāth-sāth

ārzūeñ bhī asīr-e-zulf-e-pechāñ ho ga.iiñ

garche kaalī haiñ bahut shab-hā-e-tār-e-intizār

tīrgī-e-baḳht se mere daraḳhshāñ ho ga.iiñ

bāġh-e-ālam meñ na.e gul khil rahe haiñ ai sabā

un kī zulfeñ dosh par shāyad pareshāñ ho ga.iiñ

aah jin kā husn kahtā thā ki ham ḳhākī nahīñ

sūrateñ vo ḳhaak ke parde meñ pinhāñ ho ga.iiñ

hasratoñ ko yaas ne baḳhshī hai ik taaza hayāt

miT ga.iiñ jab dāġh-e-dil ban kar numāyāñ ho ga.iiñ

ishq ke eajaz se taskin ka saman ho gain

ab jafaen bhi nawazish-ha-e-pinhan ho gain

apni aazadi pe nazan hain abas wo bulbulen

jo qafas se dur paband-e-gulistan ho gain

ab faqat tera tasawwur hai ki dil ke sath-sath

aarzuen bhi asir-e-zulf-e-pechan ho gain

garche kali hain bahut shab-ha-e-tar-e-intizar

tirgi-e-baKHt se mere daraKHshan ho gain

bagh-e-alam mein nae gul khil rahe hain ai saba

un ki zulfen dosh par shayad pareshan ho gain

aah jin ka husn kahta tha ki hum KHaki nahin

suraten wo KHak ke parde mein pinhan ho gain

hasraton ko yas ne baKHshi hai ek taza hayat

miT gain jab dagh-e-dil ban kar numayan ho gain