عشق کے مخبر کو اپنا رازداں سمجھا تھا میں

عشق کے مخبر کو اپنا رازداں سمجھا تھا میں

رہزن منزل کو میر کارواں سمجھا تھا میں

طور کے قصے کو اپنی داستاں سمجھا تھا میں

بجلیوں کے گھر کو اپنا آشیاں سمجھا تھا میں

صبح محشر بہر تجدید نماز زندگی

صور اسرافیل کو بانگ اذاں سمجھا تھا میں

آج مجھ پر ظلم ڈھاتا ہے فلک بن کر وہی

جس کو کل تک اپنی آہوں کا دھواں سمجھا تھا میں

آہ اے شور قیامت کیا کیا تو نے ستم

کچھ ابھی راز حیات جاوداں سمجھا تھا میں

مر گیا محمودؔ تجھ کو ڈھونڈ کر اے زندگی

تو کہاں آ کر ملی تجھ کو کہاں سمجھا تھا میں