ishq ke TuTe hue rishton ka matam kya karen

ishq ke TuuTe hue rishtoñ kā mātam kyā kareñ

zindagī aa tujh se phir ik baar samjhautā kareñ

zindagī kab tak tire darmāndgān-e-ārzū

ḳhvāb dekheñ aur ta.abīroñ ko sharminda kareñ

muḌ ke dekhā aur patthar ke hue is shahr meñ

ḳhud sadā ban jaao āvāzeñ agar pīchhā kareñ

nā-umīdāna bhī jiine kā salīqa hai hameñ

aa.ine TuuTe hue dil meñ sajā kar kyā kareñ

chand zarre dil ke raqsāñ haiñ fazāoñ meñ abhī

laao in zarroñ meñ hashr-e-ārzū barpā kareñ

ḳhūñ-chakāñ āñkhoñ se apnī ḳhush nahīñ ham bhī magar

chaak dāman ho to sī leñ chāk-e-dil ko kyā kareñ

bujh ga.e ek ek kar ke sab aqīdoñ ke charāġh

ai zamāne kī havā ab ye batā ham kyā kareñ

āfiyat dushman thā dil-nā-āqebat-andesh ham

ab kise ilzām deñ 'aḳhtar' kise rusvā kareñ

ishq ke TuTe hue rishton ka matam kya karen

zindagi aa tujh se phir ek bar samjhauta karen

zindagi kab tak tere darmandgan-e-arzu

KHwab dekhen aur tabiron ko sharminda karen

muD ke dekha aur patthar ke hue is shahr mein

KHud sada ban jao aawazen agar pichha karen

na-umidana bhi jine ka saliqa hai hamein

aaine TuTe hue dil mein saja kar kya karen

chand zarre dil ke raqsan hain fazaon mein abhi

lao in zarron mein hashr-e-arzu barpa karen

KHun-chakan aankhon se apni KHush nahin hum bhi magar

chaak daman ho to si len chaak-e-dil ko kya karen

bujh gae ek ek kar ke sab aqidon ke charagh

ai zamane ki hawa ab ye bata hum kya karen

aafiyat dushman tha dil-na-aqebat-andesh hum

ab kise ilzam den 'aKHtar' kise ruswa karen