عشق خوشبو سے ہے پھولوں سے شناسائی ہے

عشق خوشبو سے ہے پھولوں سے شناسائی ہے

میرا اظہار مری روح کی سچائی ہے

میری سوچوں کے مری فکر کے ایوانوں میں

جلتے بجھتے ہوئے لمحوں کی پذیرائی ہے

پھینک سکتا ہوں اسے میں نہ بجا سکتا ہوں

زندگانی ہے کہ ٹوٹی ہوئی شہنائی ہے

ٹکڑے ٹکڑے مری دھرتی کا بدن ہے ہر سو

پارہ پارہ مرے آکاش کی پہنائی ہے

اس بیابان نے کہ رستے ہوئے زخموں نے

کس نے انگنائی مری ذات کی مہکائی ہے

اس قدر خوف زدہ درد و الم ہیں مجھ سے

جیسے چہرے پہ مرے دھوپ نکل آئی ہے

جو مرے ذہن رسا کے ہے کنویں کی وصفیؔ

لفظ میں ہے نہ وہ مفہوم میں گہرائی ہے