ishq KHushbu se hai phulon se shanasai hai

'ishq ḳhushbū se hai phūloñ se shanāsā.ī hai

merā iz.hār mirī ruuh kī sachchā.ī hai

merī sochoñ ke mirī fikr ke aivānoñ meñ

jalte bujhte hue lamhoñ kī pazīrā.ī hai

pheñk saktā huuñ ise maiñ na bajā saktā huuñ

zindagānī hai ki TuuTī huī shahnā.ī hai

TukḌe TukḌe mirī dhartī kā badan hai har-sū

pāra-pāra mire ākāsh kī pahnā.ī hai

is bayābān ne ki riste hue zaḳhmoñ ne

kis ne añgnā.ī mirī zaat kī mahkā.ī hai

is qadar ḳhauf-zada dard-o-alam haiñ mujh se

jaise chehre pe mire dhuup nikal aa.ī hai

jo mire zehn-e-rasā ke hai kueñ kī 'vasfī'

lafz meñ hai na vo mafhūm meñ gahrā.ī hai

'ishq KHushbu se hai phulon se shanasai hai

mera izhaar meri ruh ki sachchai hai

meri sochon ke meri fikr ke aiwanon mein

jalte bujhte hue lamhon ki pazirai hai

phenk sakta hun ise main na baja sakta hun

zindagani hai ki TuTi hui shahnai hai

TukDe TukDe meri dharti ka badan hai har-su

para-para mere aakash ki pahnai hai

is bayaban ne ki riste hue zaKHmon ne

kis ne angnai meri zat ki mahkai hai

is qadar KHauf-zada dard-o-alam hain mujh se

jaise chehre pe mere dhup nikal aai hai

jo mere zehn-e-rasa ke hai kuen ki 'wasfi'

lafz mein hai na wo mafhum mein gahrai hai