ishq ki aag mein ab sham sa jal jaunga

'ishq kī aag meñ ab sham' sā jal jā.ūñgā

tujh lagan biich qadam gaaḌ na Tal jā.ūñgā

gar dam-e-teġh se sau baar kaTegī gardan

apnī sābit-qadamī sete sañbhal jā.ūñgā

maiñ vo jāñ-bāz o havāla huuñ patiñge kī tarah

sham'-rū tere upar jaan se jal jā.ūñgā

shajar-e-mom sā huuñ ālam-e-mauhūm ke biich

mehrbāñ garm-nigāhī se pighal jā.ūñgā

ḳhaak uḌātā huā hastī ke ta.iiñ de barbād

sar-ba-sahrā huuñ bagūle sā nikal jā.ūñgā

tere kūche kī taraf 'azm kiyā huuñ jānāñ

āḳhirash yak do qadam sar se bhī chal jā.ūñgā

chashma-e-bad-mast ko gardish meñ jo laave saaqī

abhī do jaam meñ sarshār ho chal jā.ūñgā

'ishq' hai baal se bārīk sirāt-e-mahshar

yā-'alī' kah ke tabhī us pe sañbhal jā.ūñgā

'ishq ki aag mein ab sham' sa jal jaunga

tujh lagan bich qadam gaD na Tal jaunga

gar dam-e-tegh se sau bar kaTegi gardan

apni sabit-qadami sete sanbhal jaunga

main wo jaan-baz o hawala hun patinge ki tarah

sham'-ru tere upar jaan se jal jaunga

shajar-e-mom sa hun aalam-e-mauhum ke bich

mehrban garm-nigahi se pighal jaunga

KHak uData hua hasti ke tain de barbaad

sar-ba-sahra hun bagule sa nikal jaunga

tere kuche ki taraf 'azm kiya hun jaanan

aaKHirash yak do qadam sar se bhi chal jaunga

chashma-e-bad-mast ko gardish mein jo lawe saqi

abhi do jam mein sarshaar ho chal jaunga

'ishq' hai baal se barik siraat-e-mahshar

ya-'ali' kah ke tabhi us pe sanbhal jaunga