ishq ki allah ri dushwariyan

'ishq kī allāh rī dushvāriyāñ

ik junūñ aur laakh zimmedāriyāñ

ehtimām-e-zindagi-e-ishq dekh

roz mar jaane kī haiñ tayyāriyāñ

'ishq kā ġham vo bhī tere 'ishq kā

kaun kar saktā mirī ġham-ḳhvāriyāñ

be-ḳhūdī-e-ishq jaise ġham kī niiñd

ġham kī nīñdeñ ruuh kī bedāriyāñ

ik junūn-e-ishq par qurbān haiñ

hikmat-o-irfāñ kī sau hushyāriyāñ

'ishq bhī hai kis qadar bar-ḳhud ġhalat

un kī bazm-e-nāz aur ḳhuddāriyāñ

chhūT kar rah jaa.eñ nabzeñ 'ishq kī

sahl ho jaa.eñ agar dushvāriyāñ

ye niyāz-e-ārzūmandī na dekh

aur kuchh haiñ 'ishq kī ḳhuddāriyāñ

ik nigāh be-niyāz-e-ishq tak

husn kī haiñ sab ġhalat-pindāriyāñ

ai javānī ai mohabbat marhabā

phir na ye nīñdeñ na ye bedāriyāñ

iḳhtilāj-e-qalb ke daure nahīñ

'ishq kī 'bismil' haiñ dil-āzāriyāñ

'ishq ki allah ri dushwariyan

ek junun aur lakh zimmedariyan

ehtimam-e-zindagi-e-ishq dekh

roz mar jaane ki hain tayyariyan

'ishq ka gham wo bhi tere 'ishq ka

kaun kar sakta meri gham-KHwariyan

be-KHudi-e-ishq jaise gham ki nind

gham ki ninden ruh ki bedariyan

ek junun-e-ishq par qurban hain

hikmat-o-irfan ki sau hushyariyan

'ishq bhi hai kis qadar bar-KHud ghalat

un ki bazm-e-naz aur KHuddariyan

chhuT kar rah jaen nabzen 'ishq ki

sahl ho jaen agar dushwariyan

ye niyaz-e-arzumandi na dekh

aur kuchh hain 'ishq ki KHuddariyan

ek nigah be-niyaz-e-ishq tak

husn ki hain sab ghalat-pindariyan

ai jawani ai mohabbat marhaba

phir na ye ninden na ye bedariyan

iKHtilaj-e-qalb ke daure nahin

'ishq ki 'bismil' hain dil-azariyan