ishq ki chingariyon ko phir hawa dene lage

ishq kī chiñgāriyoñ ko phir havā dene lage

mere paas aa kar vo dushman ko duā dene lage

mai-kade kā mai-kada ḳhāmosh thā mere baġhair

maiñ huā vārid to paimāne sadā dene lage

ḳhatm karnā hī paḌeñgī shām-e-ġham kī uljhaneñ

ab vo apne gesuoñ kā vāsta dene lage

e.atirāf-e-auj kā jazba nahīñ ahbāb meñ

har taraqqī par taraqqī kī duā dene lage

dostoñ kī kaj-adā.ī maiñ bhī lazzat hai 'shakīl'

dost vo hai dost ban kar jo daġhā dene lage

ishq ki chingariyon ko phir hawa dene lage

mere pas aa kar wo dushman ko dua dene lage

mai-kade ka mai-kada KHamosh tha mere baghair

main hua warid to paimane sada dene lage

KHatm karna hi paDengi sham-e-gham ki uljhanen

ab wo apne gesuon ka wasta dene lage

eatiraf-e-auj ka jazba nahin ahbab mein

har taraqqi par taraqqi ki dua dene lage

doston ki kaj-adai main bhi lazzat hai 'shakil'

dost wo hai dost ban kar jo dagha dene lage