ishq ki ek ik haqiqat dastan tak aa gai

ishq kī ik ik haqīqat dāstāñ tak aa ga.ī

aane vaalī baat thī āḳhir zabāñ tak aa ga.ī

allah allah shauq-e-sajda-rezī-e-dair-o-haram

ye jabīñ jhukte hī tere āstāñ tak aa ga.ī

azm-e-mustahkam ne baḌh kar ḳhud banā lī apnī raah

ya.anī manzil khīñch ke gard-e-kārvāñ tak aa ga.ī

ek sho.ala thā jo husn-e-āriz-e-gul se uThā

ek bijlī thī jo mere āshiyāñ tak aa ga.ī

chal paḌī ahl-e-mohabbat meñ jo zarf-e-dil kī baat

baḌhte baḌhte vus.at-e-kaun-o-makāñ tak aa ga.ī

hote hote ho ga.e ham apnī ġhaflat kā shikār

rafta rafta be-hisī ḳhvāb-e-girāñ tak aa ga.ī

tā.ir-e-be-par bache kyā daam se sayyād ke

zad meñ jab saarī fazā-e-gulsitāñ tak aa ga.ī

ham to samjhe the ḳhizāñ kā hai guloñ hī tak asar

naubat ab barbādiyoñ kī āshiyāñ tak aa ga.ī

josh-e-vahshat meñ kiyā phūloñ ne dāman chāk-chāk

ye havā sahrā se chal kar gulsitāñ tak aa ga.ī

un kī ye shoḳhī ki haiñ merī vafā par ta.ana-zan

mujh ko ye hairat ki ab naubat yahāñ tak aa ga.ī

sher-e-'muslim' meñ na kar hamdam ma.ānī kī talāsh

baat ik paidā huī dil meñ zabāñ tak aa ga.ī

ishq ki ek ek haqiqat dastan tak aa gai

aane wali baat thi aaKHir zaban tak aa gai

allah allah shauq-e-sajda-rezi-e-dair-o-haram

ye jabin jhukte hi tere aastan tak aa gai

azm-e-mustahkam ne baDh kar KHud bana li apni rah

yani manzil khinch ke gard-e-karwan tak aa gai

ek shoala tha jo husn-e-ariz-e-gul se uTha

ek bijli thi jo mere aashiyan tak aa gai

chal paDi ahl-e-mohabbat mein jo zarf-e-dil ki baat

baDhte baDhte wusat-e-kaun-o-makan tak aa gai

hote hote ho gae hum apni ghaflat ka shikar

rafta rafta be-hisi KHwab-e-giran tak aa gai

tair-e-be-par bache kya dam se sayyaad ke

zad mein jab sari faza-e-gulsitan tak aa gai

hum to samjhe the KHizan ka hai gulon hi tak asar

naubat ab barbaadiyon ki aashiyan tak aa gai

josh-e-wahshat mein kiya phulon ne daman chaak-chaak

ye hawa sahra se chal kar gulsitan tak aa gai

un ki ye shoKHi ki hain meri wafa par tana-zan

mujh ko ye hairat ki ab naubat yahan tak aa gai

sher-e-'muslim' mein na kar hamdam maani ki talash

baat ek paida hui dil mein zaban tak aa gai