عشق کی اک اک حقیقت داستاں تک آ گئی

عشق کی اک اک حقیقت داستاں تک آ گئی

آنے والی بات تھی آخر زباں تک آ گئی

اللہ اللہ شوق سجدہ ریزیٔ دیر و حرم

یہ جبیں جھکتے ہی تیرے آستاں تک آ گئی

عزم مستحکم نے بڑھ کر خود بنا لی اپنی راہ

یعنی منزل کھینچ کے گرد کارواں تک آ گئی

ایک شعلہ تھا جو حسن عارض گل سے اٹھا

ایک بجلی تھی جو میرے آشیاں تک آ گئی

چل پڑی اہل محبت میں جو ظرف دل کی بات

بڑھتے بڑھتے وسعت کون و مکاں تک آ گئی

ہوتے ہوتے ہو گئے ہم اپنی غفلت کا شکار

رفتہ رفتہ بے حسی خواب گراں تک آ گئی

طائر بے پر بچے کیا دام سے صیاد کے

زد میں جب ساری فضائے گلستاں تک آ گئی

ہم تو سمجھے تھے خزاں کا ہے گلوں ہی تک اثر

نوبت اب بربادیوں کی آشیاں تک آ گئی

جوش وحشت میں کیا پھولوں نے دامن چاک چاک

یہ ہوا صحرا سے چل کر گلستاں تک آ گئی

ان کی یہ شوخی کہ ہیں میری وفا پر طعنہ زن

مجھ کو یہ حیرت کہ اب نوبت یہاں تک آ گئی

شعر مسلمؔ میں نہ کر ہمدم معانی کی تلاش

بات اک پیدا ہوئی دل میں زباں تک آ گئی