عشق کی راہ میں اک وہ بھی مقام آتا ہے

عشق کی راہ میں اک وہ بھی مقام آتا ہے

راہرو کے لیے منزل کا سلام آتا ہے

مطمئن بے پر و بالی پہ ہوں یوں ہم نفسو

وقف پرواز ہی اکثر تہ دام آتا ہے

وجہ بربادیٔ دل پوچھ رہی ہے دنیا

لب پہ کیا جانیے کیوں آپ کا نام آتا ہے

دل ناکام سہی پھر بھی تو میرا دل ہے

یہی نا کام برے وقت میں کام آتا ہے

روح آنکھوں میں سمٹتی نظر آتی ہے مجھے

کیا کسی بھولنے والے کا پیام آتا ہے

یہ بھی ساقی کی نگاہوں کا کرم ہے انورؔ

ذکر سنتے ہی مرا وجد میں جام آتا ہے