عشق کی شمع کرے دل میں فروزاں کوئی

عشق کی شمع کرے دل میں فروزاں کوئی

پھر نہ ہو تیرگیٔ زیست کا ساماں کوئی

لذت عشق سے واقف جو ہو ناداں کوئی

دور دل سے نہ کرے پھر غم جاناں کوئی

رہا محروم شہادت سے بھی میں وائے نصیب

ذبح کرنے کو گیا بھول رگ جاں کوئی

رہ کے دنیا میں رہیں دور ہم اس سے کیوں کر

اپنے ساتھی سے جدا ہوتا ہے انساں کوئی

چین سے سویا وہی دور جو دنیا سے رہا

دیکھ لے جا کے ذرا شہر خموشاں کوئی

ایک قطرہ بھی نہیں خون کا باقی جوہرؔ

کیسے دیکھے بھری آنکھوں کو گل افشاں کوئی