ishq ki shoala-mizaji KHud hi barsati hai aag

ishq kī sho.ala-mizājī ḳhud hī barsātī hai aag

baañs ke jañgal meñ apne-āp lag jaatī hai aag

jaan lene ke tarīqe kis qadar dilchasp haiñ

zahr barsātī hai shabnam phuul barsātī hai aag

harf jab aatā hai nāmūs-o-vaqār-e-ishq par

shiddat-e-ehsās se rag rag meñ lahrātī hai aag

nā-muvāfiq daur meñ apne bhī ho jaate haiñ ġhair

ḳhushk mausam ho to dīvāroñ meñ lag jaatī hai aag

dekhne vaale zarā nazdīk jā kar dekhte

duur se ḳhush-rañg ḳhush-paikar nazar aatī hai aag

ātish-e-jazbāt se raushan he duniyā-e-'mushīr'

jism ke āzar-kade meñ nuur ban jaatī hai aag

ishq ki shoala-mizaji KHud hi barsati hai aag

bans ke jangal mein apne-ap lag jati hai aag

jaan lene ke tariqe kis qadar dilchasp hain

zahr barsati hai shabnam phul barsati hai aag

harf jab aata hai namus-o-waqar-e-ishq par

shiddat-e-ehsas se rag rag mein lahraati hai aag

na-muwafiq daur mein apne bhi ho jate hain ghair

KHushk mausam ho to diwaron mein lag jati hai aag

dekhne wale zara nazdik ja kar dekhte

dur se KHush-rang KHush-paikar nazar aati hai aag

aatish-e-jazbaat se raushan he duniya-e-'mushir'

jism ke aazar-kade mein nur ban jati hai aag