ishq ko dil mein chhupa lete hain kaamil kyunkar

ishq ko dil meñ chhupā lete haiñ kāmil kyūñkar

un par āsān huā kartī hai mushkil kyūñkar

hadaf-e-nāvik-e-mizgān-o-kamāñ abrū thā

na taḌaptā shab-e-furqat dil-e-bismil kyūñkar

apne bīmār-e-mohabbat ko bhī lete jaao

tum chale jaate ho pahlū meñ rahe dil kyūñkar

sar kaTā kar tire kūche meñ yahī dekhūñgā

suraḳh-rū hotā hai ḳhanjar tirā qātil kyūñkar

mir.at-e-dil kī safā.ī vo kahāñ pā.egā

aa.ina hogā ruḳh-e-yār ke qābil kyūñkar

ye tamāshā bhī mire dil ko jilā kar dekho

sham.a hasrat se jalī bar-sar-e-mahfil kyūñkar

bahr-e-ulfat meñ bhī vahshat thī dil-e-ġham-ghīñ ko

rakhtā āġhosh meñ phir dāman-e-sāhil kyūñkar

dekhnā lutf dam-e-qatl zarā ai qātil

ḳhāk-o-ḳhūñ meñ huā ġhaltāñ tirā bismil kyūñkar

zer-e-ḳhanjar mire ḳhuuñ ne use uḌ kar thāmā

us ke panje se chhuTe dāman-e-qātil kyuuñ kar

dekhnā gar ho to aao maiñ dikhā duuñ tum ko

ban gayā sheḳh-e-haram but-kada-e-dil kyūñkar

rāz-e-sar-basta 'jamīla' maiñ kahūñ kyā tujh se

ho gayā merā ye dil ārif-e-kāmil kyūñkar

ishq ko dil mein chhupa lete hain kaamil kyunkar

un par aasan hua karti hai mushkil kyunkar

hadaf-e-nawik-e-mizgan-o-kaman abru tha

na taDapta shab-e-furqat dil-e-bismil kyunkar

apne bimar-e-mohabbat ko bhi lete jao

tum chale jate ho pahlu mein rahe dil kyunkar

sar kaTa kar tere kuche mein yahi dekhunga

suraKH-ru hota hai KHanjar tera qatil kyunkar

mirat-e-dil ki safai wo kahan paega

aaina hoga ruKH-e-yar ke qabil kyunkar

ye tamasha bhi mere dil ko jila kar dekho

shama hasrat se jali bar-sar-e-mahfil kyunkar

bahr-e-ulfat mein bhi wahshat thi dil-e-gham-ghin ko

rakhta aaghosh mein phir daman-e-sahil kyunkar

dekhna lutf dam-e-qatl zara ai qatil

KHak-o-KHun mein hua ghaltan tera bismil kyunkar

zer-e-KHanjar mere KHun ne use uD kar thama

us ke panje se chhuTe daman-e-qatil kyun kar

dekhna gar ho to aao main dikha dun tum ko

ban gaya sheKH-e-haram but-kada-e-dil kyunkar

raaz-e-sar-basta 'jamila' main kahun kya tujh se

ho gaya mera ye dil aarif-e-kaamil kyunkar