ishq ko jitna bhi samjha humne

'ishq ko jitnā bhī samjhā ham ne

bevafā.ī meñ hī samjhā ham ne

aañkh khulne ko karāmat jaanā

sub.h ko vāpsī samjhā ham ne

vasl ke baa'd kiyā vasl pe ġhaur

hijr ko peshgī samjhā ham ne

vo jo pahle se pata thā ham ko

dūsroñ se vahī samjhā ham ne

har palak pahlī thī jhapkā.ī jo

saañs ko āḳhirī samjhā ham ne

aaj inkār kiyā jānñe se

aaj kuchh vāqa'ī samjhā ham ne

'ishq ko jitna bhi samjha hum ne

bewafai mein hi samjha hum ne

aankh khulne ko karamat jaana

subh ko wapsi samjha hum ne

wasl ke ba'd kiya wasl pe ghaur

hijr ko peshgi samjha hum ne

wo jo pahle se pata tha hum ko

dusron se wahi samjha hum ne

har palak pahli thi jhapkai jo

sans ko aaKHiri samjha hum ne

aaj inkar kiya jaanne se

aaj kuchh waqa'i samjha hum ne