ishq ko kaenat ka maqsad-o-muddaa samajh

ishq ko kā.enāt kā maqsad-o-mudda.ā samajh

phir tirā zarf hai use dard samajh davā samajh

rāh-e-vafā meñ mujh ko hukm ye hai ki apne aap ko

uTh to ġhubār kar ḳhayāl baiTh to naqsh-e-pā samajh

maiñ jo harīm-e-nāz meñ sham-e-sifat ḳhamosh huuñ

is ko bhī ai nigāh-e-lutf koshish-e-iltijā samajh

ai dil-e-be-qarār-e-dost duur hai manzil-e-vafā

jā tujhe shauq de ḳhudā mujh ko shikasta-pā samajh

terā charāġh-e-zindagī āḳhirī saañs le jahāñ

ishq ke us maqām ko dā.era-e-baqā samajh

duniyā se ahl-e-ishq ko koī nahīñ hai vāsta

sab se huuñ maiñ alag-thalag sab se mujhe judā samajh

mere niyāz par hai tang dair-o-haram kī zindagī

ab ise abtarī samajh yā ise irtiqā samajh

hastī-e-dost se alag terā vajūd kuchh nahīñ

apnī taraf bhī ab na dekh ḳhud ko bhī mā-sivā samajh

arz-o-samā barā-e-dost kaun-o-makāñ sarā-e-dost

jo bhī hai māsivā-e-dost hirs samajh havā samajh

ishq meñ aur husn meñ koī nahīñ hai imtiyāz

ye bhī mirī adā samajh vo bhī mirī adā samajh

jin meñ na josh ho 'zafar' vo mire zamzame nahīñ

dil se jo kheltī uThe us ko mirī navā samajh

ishq ko kaenat ka maqsad-o-muddaa samajh

phir tera zarf hai use dard samajh dawa samajh

rah-e-wafa mein mujh ko hukm ye hai ki apne aap ko

uTh to ghubar kar KHayal baiTh to naqsh-e-pa samajh

main jo harim-e-naz mein sham-e-sifat KHamosh hun

is ko bhi ai nigah-e-lutf koshish-e-iltija samajh

ai dil-e-be-qarar-e-dost dur hai manzil-e-wafa

ja tujhe shauq de KHuda mujh ko shikasta-pa samajh

tera charagh-e-zindagi aaKHiri sans le jahan

ishq ke us maqam ko daera-e-baqa samajh

duniya se ahl-e-ishq ko koi nahin hai wasta

sab se hun main alag-thalag sab se mujhe juda samajh

mere niyaz par hai tang dair-o-haram ki zindagi

ab ise abtari samajh ya ise irtiqa samajh

hasti-e-dost se alag tera wajud kuchh nahin

apni taraf bhi ab na dekh KHud ko bhi ma-siwa samajh

arz-o-sama bara-e-dost kaun-o-makan sara-e-dost

jo bhi hai masiwa-e-dost hirs samajh hawa samajh

ishq mein aur husn mein koi nahin hai imtiyaz

ye bhi meri ada samajh wo bhi meri ada samajh

jin mein na josh ho 'zafar' wo mere zamzame nahin

dil se jo khelti uThe us ko meri nawa samajh