ishq kya hai KHud-faramoshi musalsal iztirab

ishq kyā hai ḳhud-farāmoshī musalsal iztirāb

husn kyā hai jalva-ārā.ī ba-andāz-e-hijāb

ruuh muztar dil pareshāñ chashm hai mahrūm-e-ḳhvāb

maiñ bahut masrūr huuñ ai ishq tū hai kāmyāb

jaañ nisāroñ par tumhāre raaz ye ifshā huā

maut lutf-e-sarmadī hai ziist yaksar iztirāb

chāk-dāmānī kā ġham hai ab na kuchh fikr-e-rafū

kar chuke dīvāne tum se zindagī kā intisāb

gul fasurda hoñ ḳhas-o-ḳhāshāk meñ bālīdgī

bāġhbāñ aisā to aayā thā na pahle inqilāb

do-jahāñ meñ sirf ye hai ishq kī daulat 'saġhīr'

sīna-e-pur-dāġh chashm-e-tar dil-e-hasrat-ma.āb

ishq kya hai KHud-faramoshi musalsal iztirab

husn kya hai jalwa-arai ba-andaz-e-hijab

ruh muztar dil pareshan chashm hai mahrum-e-KHwab

main bahut masrur hun ai ishq tu hai kaamyab

jaan nisaron par tumhaare raaz ye ifsha hua

maut lutf-e-sarmadi hai zist yaksar iztirab

chaak-damani ka gham hai ab na kuchh fikr-e-rafu

kar chuke diwane tum se zindagi ka intisab

gul fasurda hon KHas-o-KHashak mein baalidgi

baghban aisa to aaya tha na pahle inqilab

do-jahan mein sirf ye hai ishq ki daulat 'saghir'

sina-e-pur-dagh chashm-e-tar dil-e-hasrat-maab