ishq mein awwal fana darkar hai

ishq meñ avval fanā darkār hai

dil siiñ tark-e-mā-sivā darkār hai

tark-e-maqsad ain maqsad hai use

jis kuuñ dil kā mudda.ā darkār hai

dil ba-tañg aayā hai ab lāzim hai aah

ġhuncha-e-gul kuuñ sabā darkār hai

zaḳhmī-e-ġham kyuuñ na khīñche āh-e-dard

halq-e-bismil kuuñ sadā darkār hai

vasf zulf-e-yār kā āsāñ nahīñ

rishta-e-fikr-e-rasā darkār hai

hai lab-e-sāqī meñ chashma ḳhizr kā

gar tujhe āb-e-baqā darkār hai

rañg merā kān-e-zar hai ai sanam

mujh siiñ aa mil gir talā darkār hai

gosha-e-abrū dikhā ai qibla-rū

mujh kuuñ mehrāb-e-duā darkār hai

dil raqīboñ kā jalāne ai 'sirāj'

ātishīñ-rū dilrubā darkār hai

ishq mein awwal fana darkar hai

dil sin tark-e-ma-siwa darkar hai

tark-e-maqsad ain maqsad hai use

jis kun dil ka muddaa darkar hai

dil ba-tang aaya hai ab lazim hai aah

ghuncha-e-gul kun saba darkar hai

zaKHmi-e-gham kyun na khinche aah-e-dard

halq-e-bismil kun sada darkar hai

wasf zulf-e-yar ka aasan nahin

rishta-e-fikr-e-rasa darkar hai

hai lab-e-saqi mein chashma KHizr ka

gar tujhe aab-e-baqa darkar hai

rang mera kan-e-zar hai ai sanam

mujh sin aa mil gir tala darkar hai

gosha-e-abru dikha ai qibla-ru

mujh kun mehrab-e-dua darkar hai

dil raqibon ka jalane ai 'siraj'

aatishin-ru dilruba darkar hai