ishq mein dariya kya hain samundar par kiye ja sakte hain

ishq meñ dariyā kyā haiñ samundar paar kiye jā sakte haiñ

josh-e-junūñ se koh-e-girāñ mismār kiye jā sakte haiñ

dil se niklī aah se aksar arsh-e-barīñ hil jaatā hai

abr-e-duā se sahrā bhī gulzār kiye jā sakte haiñ

bāġh-e-jināñ kausar kā kināra yā ki pahāḌī tuubā kī

ḳhvāb kī āñkhoñ se kyā kyā dīdār kiye jā sakte haiñ

toḌ ke jin ko hotā ho ehsās-e-ziyāñ har baar magar

aise va.ade ek nahīñ sau baar kiye jā sakte haiñ

ek zabāñ kitne rishtoñ ko begāna kar detī hai

aur isī se ġhair bhī rishte-dār kiye jā sakte haiñ

ā.īnoñ meñ chehroñ kī sachchā.ī dikhā.ī detī hai

kyā chehre bhī aise hī zangār kiye jā sakte haiñ

baad ke har aane vaale ko mushkil phir darpesh na ho

manzil tak aate raste hamvār kiye jā sakte haiñ

ishq mein dariya kya hain samundar par kiye ja sakte hain

josh-e-junun se koh-e-giran mismar kiye ja sakte hain

dil se nikli aah se aksar arsh-e-barin hil jata hai

abr-e-dua se sahra bhi gulzar kiye ja sakte hain

bagh-e-jinan kausar ka kinara ya ki pahaDi tuba ki

KHwab ki aankhon se kya kya didar kiye ja sakte hain

toD ke jin ko hota ho ehsas-e-ziyan har bar magar

aise wade ek nahin sau bar kiye ja sakte hain

ek zaban kitne rishton ko begana kar deti hai

aur isi se ghair bhi rishte-dar kiye ja sakte hain

aainon mein chehron ki sachchai dikhai deti hai

kya chehre bhi aise hi zangar kiye ja sakte hain

baad ke har aane wale ko mushkil phir darpesh na ho

manzil tak aate raste hamwar kiye ja sakte hain